Þúsundir barna hlaupa maraþon á morgun

Á morgun munu þúsundir barna víðs vegar um heiminn hlaupa maraþon og vekja þannig athygli á baráttunni gegn barnadauða í heiminum. Þetta er í fimmta sinn sem hlaupið er haldið en Ísland tekur nú þátt í fyrsta sinn þegar 140 börn úr fjórum skólum mæta til keppni í Laugardalshöll.

Hlaupið nefnist Kapphlaupið um lífið og er ákall til stjórnvalda og ráðamanna um að leggja sitt af mörkum til að koma í veg fyrir barnadauða.

Rúmlega 20 þúsund börn taka þátt í maraþoninu en hvert og eytt þeirra hleypur þó ekki heilt maraþon. Börnin hlaupa í liðum. Þannig hlaupa 26-36 börn eitt maraþon í boðhlaupsformi þar sem hver og einn heypur 200 metra í einu. Með þessu fyrirkomulagi geta börnin hlaupið heilt maraþon á miklum hraða og til að mynda náðu á síðasta ári níu lið að slá maraþonheimsmet Patrick Makau sem er 2:03:38. Besti tíminn sem náðst hefur í Kapphlaupinu um lífið er 1:51:52 en það gerðist í Kenýa í fyrra.

Íslensku börnin eru á aldrinum 11-13 ára og það verður spennandi að sjá hvaða tíma þau ná.

Eitt af markmiðum Þróunaráætlunar Sameinuðu þjóðanna er að fækka fjölda barnadauða um tvo þriðju fyrir árið 2015, en enn er þróunin of hæg og lyfta þarf grettistaki til að ná því markmiði. Næstu þrjú árin munu ráða úrslitum um hvort milljónir barna halda áfram að deyja af viðráðanlegum orsökum eða ekki.