Flytja 24 þúsund lítra af vatni til flóttamanna

Gámur með 24 þúsund lítra af vatni verður fluttur frá Íslandi í vikunni til flóttamannabúða í Panama í Mið-Ameríku. Vatnið verður flutt með sérstökum hætti sem gæti verið upphafið að nýrri hugmyndafræði í því hvernig flytja megi vatn inn á fjarlæg og erfið svæði.

Þessir 24 þúsund lítrar eru fluttir í einu lagi í stórum belg sem komið er fyrir í 20 feta gámi, svonefndum flexitank. „Þetta er fyrsta ferðin og ákveðið tilraunaverkefni," segir Björn Einarsson, framkvæmdastjóri TVG-Zimsen, sem er umboðsaðili þeirra sem sjá um flutninginn. „Ísland getur gegnt lykilhlutverki í vatnsútflutningi þar sem við höfum gríðarlegt magn af vatni."

Vatnsmagnið sem verður flutt í þessari einu ferð samsvarar daglegri lágmarksvatnsþörf nærri 5 þúsund flóttamanna, en í dag eru þeir taldir vera um 43 milljónir talsins.

Það eru íslenska vatnsfyrirtækið Brúarfoss Iceland ehf. og kanadísku góðgerðarsamtökin On Guard for Humanity sem eru í samstarfi við Flóttamannahjálp Sameinuðu þjóðanna um verkefnið.