Verkfræðingar sjá fátt framundan á Íslandi

Noregur er orðinn helsta líftaug íslenska verkfræðigeirans, og nema verkefnin þar nú milljörðum króna á ári. Norðmenn vilja enn meiri sérfræðivinnu frá Íslandi á næstu árum. Verkfræðingar, arkitektar og verktakar voru meðal þeirra sem sóttu fund Íslandsstofu á Hilton hótelinu í Reykjavík í dag, - ekki um það sem er framundan á Íslandi, heldur um það sem er framundan í Noregi.

Egill Viðarsson, verkefnastjóri hjá Almennu verkfræðistofunni, segir að staðan á Íslandi sé ekki góð og hafi lítið batnað að undanförnu. Menn sjái ekki margt framundan hérlendis á næstu 1-2 árum. Egill segir að um helmingur verkefna Almennu verkfræðistofunnar sé nú í Noregi, og segir norska markaðinn þegar skila verulegum tekjum til íslenskra verkfræðinga og hönnuða, sem hann áætlar 3-5 milljarða króna á ári.

Og nóg verður að gera á næstu árum í Noregi, miðað við orð yfirmanns norsku Vegagerðarinnar, Björns Erik Selnes, á fundinum í dag en Norðmenn vantar erlent vinnuafl meðal annars til að standa undir 45 prósenta aukningu samgönguframkvæmda á næstu árum.

„Verkefnin bíða í röðum svo við höfum mikinn áhuga á að fá liðveislu frá Íslandi," sagði norski Vegagerðarmaðurinn.

Egill Viðarsson segir að án Noregsverkefna væri staðan mjög slæm hjá íslenskum verkfræðingum en það sé ekki auðvelt að sækja vinnu til útlanda. Það sé bæði erfitt fyrir starfsfólk að vera fjarri fjölskyldu á Íslandi og það sé einnig dýrt fyrir fyrirtækin.

„Þetta er mikið meiri kostnaður heldur en að sækja verkefnin á Íslandi. Þetta er ekki allt hamingja að sækja verkefnin til Noregs. Það kostar líka töluvert mikið meira," segir Egill.