Þrjár álftir í viðbót skotnar við Stokkseyri

Eins og fram hefur komið þá var lögreglunni á Selfossi tilkynnt um sex dauðar álftir í fjörunni á Stokkseyri um helgina, sem höfðu verið skotnar. Nú hafa þrjár aðrar álftir fundist dauðar eftir skot, eða á bökkum Vola, sem er veiðisvæði rétt við Stokkseyri.

Jóhann Óli Hilmarsson, formaður Fuglaverndarfélags Íslands, sem býr jafnframt á Stokkseyri er mjög óhress með stöðu mála varðandi dauðu álftirnar.

"Þetta er hefðbundið hatur á meintum samkeppnisaðilum, hvort sem þeir heita álftir, gæsir, máfar, hrafnar eða tófur. Menn halda að álftir rústi túnum fyrir þeim og víla ekki fyrirsér að grípa til hernaðaraðgerða, þó svo að fuglinn sé friðaður. Sumir menn sjá aldrei útfyrir byssuhlaupið, en það er hægt að gera margt annað heldur en að drepa fuglana," segir Jóhann Óli.

„Það hefur t.d. reynst vel að strengja plastborða milli staura í landinu og lenda fuglarnir þá ekki þar. Einnig að setja lága girðingu umhverfis kornakra, álftir (og gæsir) þurfa flugbraut og lenda ekki í miðjum óslegnum kornökrum eða túnum, heldur í lægri gróðri og rölta sér svo yfir í ætið. Svo mætti lengi telja, aðferðirnar eru margar. Menn þurfa bara að hafa getu og nennu til að spá aðeins í þær. Það þarf að rannasaka álftabeit og skoða betur aðferðir við að halda þeim frá stöðum þar sem þær mega ekki vera.

Með aukinni kornrækt, bæði hér og á vetrarstöðvunum, er hreinlega verið að fóðra álftir og gæsir. Menn þurfa einfaldlega að greiða einhvern toll af því. Menn tala stöðugt um að álftum fari fjölgandi, en íslenski stofninn telur aðeins tæpa 27.000 fugla að hausti. Þetta er mjög sálrænt, álftin er stór, hvítur og hávær fugl og er tala þeirra því oft á tíðum mjög orðum aukin."