Barnungir gerendur í kynferðisbrotamálum líkja eftir klámefni

Börn sem sjá klámefni geta farið að sýna kynferðislega hegðun, jafnvel svo alvarlega að grunur vaknar um að þau hafi verið beitt kynferðisofbeldi. Inn á borð Barnahúss hafa komið mál þar sem barnungir gerendur í kynferðisbrotamálum reyna að líkja eftir klámefni.

Færri komust að en vildu á ráðstefnu um klám sem haldin var í dag á vegum ráðuneyta innanríkis, velferðar og mennta og menningar, í samstarfi við lagadeild Háskóla Íslands.

Þar var meðal annars fjallað um áhrif kláms á börn og unglinga, sem oft rekast jafnvel óvart á efnið á netinu.

„Við sjáum að börn sem koma til okkar, kannski vegna kynferðislegrar hegðunar eða að þau hafa teiknað mjög kynferðislegar myndir, taka þátt í kynferðislegum leikjum með jafnöldrum," segir Þorbjörg Sveinsdóttir, sérfræðingur hjá Barnahúsi.

Hún segir að þetta séu börn allt niður í fjögurra ára gömul og hegðunin orðin alvarlegt vandamál.

„Þá koma þessi börn í könnunarviðtöl til okkar í Barnahúsi og við erum að kanna hvort þessi börn hafi orðið fyrir kynferðislegu ofbeldi eða hvað það er sem veldur því að þau eru með þennan hegðunarvanda. Það sem kemur oft í ljós er að þau hafa ekki orðið fyrir kynferðisofbeldi, þessi börn sem eru með þessa miklu hegðun, heldur hafa þau séð eitthvað, í tölvunni, í sjónvarpinu."

Samkvæmt tölum sem Þorbjörg tók saman fyrir Barnahús eru gerendur í kynferðisbrota í ríflega þriðjungi tilvika sjálfir börn, á aldrinum tólf til átján ára.

„Þessi mál eru oft mjög alvarleg. Ungmenni með óæskilega kynferðislega hegðun gagnvart öðrum börnum, þarna sér maður oft hluti beint úr klámefni. Ég man eftir stúlku sem sagði frá því að sá sem misnotaði hana gerði alltaf það sama - nema þegar hann var búinn að sjá eitthvað nýtt í kynlífsmyndum: „Eins og að binda mig," þá gerði hann það. Þarna erum við að tala um sex ára barn og tólf ára gamalt barn. Þannig að þetta er oft gróft ofbeldi."