Vísar fréttum af yfirvofandi greiðslufalli til föðurhúsanna

Fréttir og fullyrðingar um að Íbúðalánasjóður standi frammi fyrir greiðslufalli á skuldbindingum sínum eiga sér ekki efnislega stoð í efnahag, lausafjárstöðu eða rekstri sjóðsins. Þetta segir Sigurður Erlingsson, forstjóri Íbúðalánasjóðs, í tilkynningu sem hann sendi nú eftir hádegi vegna frétta Bloomberg fréttastofunnar af vanda sjóðsins.

Í tilkynningu Sigurðar segir að mikilvægt sé að draga ekki ályktanir um lausafjárstöðu sjóðsins og greiðslugetu út frá eiginfjárhlutfalli sjóðsins. Hann segir að lausafjárstaða og greiðslugeta Íbúðalánasjóður sé í mjög sterkri stöðu til að mæta afborgunum lána sinna.