Einn stærsti listaverkaþjófnaður síðari tíma

Málverkum eftir Picasso, Matisse, Gauguin, Monet o. fl. var stolið í gær af safni í Rotterdam í Hollandi. Þjófnaðurinn þykir einn sá tilkomumesti í langan tíma.

Menn eru tregir til að smella ákveðnum verðmiðum á verkin sem hurfu en sérfræðingar telja að verðmæti þeirra geti numið tugum milljóna punda. „Þau gætu verið 50 milljón punda virði, eða meira," segir Jop Ubbens, framkvæmdastjóri listaverkasölunnar Christie's í Amsterdam. Fimmtíu milljón pund nema tæpum 10 milljörðum króna. Aðrir hafa nefnt hærri tölur, allt upp undir 200 milljón evrur, rúmir 32 milljarðar íslenskra króna.

Lögregla telur þjófana hafa verið vel skipulagða og djarfa þegar þeir stálu sjö verkum í morgunsárið af Kunsthal listasafninu. Talið er líklegt að þjófarnir hafi notað höfnina í Rotterdam til að koma verkunum snarlega úr landi.

Áðurnefndur framkvæmdastjóri, Jop Ubbens, telur ekki ólíklegt að verkunum hafi verið stolið eftir pöntun listaverkasafnara „en þá eru þau líklega komin upp á vegg einhvers staðar núna og munu aldrei sjást aftur." Hann telur einnig mögulegt að þjófarnir muni krefjast lausnargjalds fyrir verkin. Aftur á móti telur hann mjög ólíklegt að verkin verði seld á opnum markaði. „Það væri mjög heimskuleg hugmynd," segir hann.

Frá þessu er sagt í breska blaðinu The Guardian í dag.