Saksóknari Alþingis kostaði 66,8 milljónir

Heildarkostnaður við embætti saksóknara Alþingis vegna landsdómsmálaferlanna gegn Geir H. Haarde var 66,8 milljónir króna. Í fjárlögum var gert ráð fyrir 36,4 milljóna króna fjárheimildum og því var keyrt fram úr áætlunum um 30,4 milljónir króna.

Saksóknari Alþingis var kjörinn á þingfundi 12. október 2010 og hóf þá störf við verkefni sitt. Lauk starfi hans við dómtöku málsins 16. mars 2012. Hann hafði annan saksóknara til vara sér til aðstoðar sem Alþingi kaus jafnframt í október 2010. Þá aðstoðuðu fleiri starfsmenn saksóknara við undirbúning málsins.

Kostnaðurinn fór að mestu leyti í launagjöld en 52,1 milljón fóru í laun starfsmanna á þessum þremur árum. Afgangurinn fór í húsaleigu, aðkeypta sérfræðivinnu, tæki og búnað og fleira.

Þetta kom fram í svari forseta Alþingis við fyrirspurn Ragnheiðar E. Árnadóttur. Hér að neðan má sjá sundurliðun kostnaðarins.