Búið að kæra framkvæmd þjóðaratkvæðagreiðslunnar

Framkvæmd þjóðaratkvæðagreiðslunnar um tillögur stjórnlagaráðs hefur verið kærð til landskjörstjórnar. Kærandi fer ekki fram á ógildingu kosninganna en vonast til þess að framkvæmdinni á atkvæðagreiðslu utan kjörfundar verði breytt.

Svavar Kjarrval Lúthersson kærði atkvæðagreiðsluna eftir að hann greiddi atkvæði sitt utan kjörfundar. Þegar hann mætti á kjörstað var hann beðinn um að undirrita fylgibréf áður en hann fékk kjörseðil í hendurnar. Á fylgibréfinu sagði að kjósandi hefði kosið í einrúmi, sett kjörseðilinn í umslag og lokað því. Það hlýtur að teljast nokkuð öfugsnúið að undirrita slíka fullyrðingu áður en viðkomandi fær kjörseðilinn í hendurnar.

Ekki nóg með að fyrirkomulagið sé öfugsnúið heldur er það líka andstætt lögum að mati Svavars. „Í lögum um kosningar til Alþingis er greinilega tekið fram að áritun og undirritun fylgibréfsins eigi að fara fram eftir að atkvæði hefur verið greitt og það sett í kjörseðilsumslagið," segir Svavar í kæru sinni.

Samkvæmt lögum um framkvæmd þjóðaratkvæðagreiðslna gilda lög um kosningar til Alþingis eftir því sem við verður komið.

Svavar vill alls ekki að þjóðaratkvæðagreiðslan verði ógilt. „Ég vona að þeir ákveði ekki sjálfir að ógilda atkvæðagreiðsluna," segir hann. Svavar vill bara að framkvæmdinni verði breytt svo hún samræmist lögum.