Samningsdrög vegna Grímsstaða komin í hendur ótengdra aðila

Drögum að samningi við Huang Nubo vegna Grímsstaða á Fjöllum var lekið til ótengdra aðila. Talsmaður Nubo segir þennan trúnaðarbrest alvarlegt mál.

Framkvæmdastjóri Zhongkun á Íslandi, fyrirtækis Huang Nubo, hélt í dag fyrirlestur undir yfirskriftinni „Tilraun kínversks einkafyrirtækis til að fjárfesta á Íslandi."

Opnað var fyrir fyrirspurnir úr sal og kom þá í ljós að þar voru áheyrendur með drög að samningi vegna Grímsstaða undir höndum.

„Ég átti nú ekki von á því að honum hefði verið lekið vegna þess að mér vitanlega hefur ríkisstjórnin ekki einu sinni fengið formlegt eintak af honum, þannig að ég veit ekki hvernig á því stendur. En það er mjög alvarlegt mál ef það er ekki hægt að halda trúnað í þessu máli, því þetta er auðvitað samningur einkafyrritækis við opinbera aðila í þessu tilfelli. Samningurinn er ekki undirritaður og það er enná verið að snurfusa hann til þannig að það er óeðlilegt að aðili úti í bæ sem málinu tengist ekki með neinum hætti skuli vera með eintak," segir Halldór Jóhannsson, framkvæmdastjóri Zhongkun á Íslandi.

En hvaðan getur honum hafa verið lekið?

„Ég get ekki tjáð mig um það. Mér er það ókunnugt. Þetta hefur eingöngu verið í höndum sveitarstjórnarmanna og þeirra næstu samstarfsmanna sem að þessu hafa komið," segir Halldór.

Lekinn kemur sveitarstjóra Norðurþings einnig í opna skjöldu.

„Já, þetta kemur mér nokkuð á óvart. Að vísu er ekki um nein leyndarmál að ræða. Engu að síður eru samningarnir ekki fullgerðir og við vorum búnir að ákveða að gera þá opinbera um leið og þeir yrðu fullgerðir," segir Bergur Elías Ágústsson, sveitarstjóri í Norðurþingi.

Hverjir eru það sem hafa aðgang að þessu drögum?

„Það er stjórn GáF sem fer með þessi mál, fyrir tveimur vikum afhenti ég samninganasíðan þeirri ráðherranefnd sem fer með þetta mál," segir Bergur.

Þá segir hann þau hafa komið til umfjöllunar hjá sveitastjórnum þannig að það sé nokkur fjöldi aðila sem hefur fengið þau til skoðunar.

„Mér þykir þetta bara miður," segir hann.

Það eru þau Lára Hanna Einarsdóttir, Jón Þórisson og Guðmundur Vilhjálmsson sem hafa drögin undir höndum. Nú síðdegis áttu þau fund með fulltrúum ráðherranefndarinnar, sem þau óskuðu eftir til að kynna henni gögn sem þau hafa aflað sér um fyrirhugaðar fjárfestingar Nubo. Fundurinn var án niðurstöðu. Þá kom Halldór Jóhannsson einnig fyrir nefndina.

Fréttastofa hefur ekki fengið afrit af drögunum.