Vill ekki að öll atkvæði hafi jafnt vægi

Einar K. Guðfinnsson, þingmaður Sjálfstæðisflokksins, er ekki hlyntur því að landið verði eitt kjördæmi og vægi allra atkvæða á landinu verði jafnt. Í þjóðaratkvæðagreiðslu sem fram fer 20. október næstkomandi verður m.a. kosið um hvort rétt sé að hafa vægi allra atkvæða jafnt á landinu.

Einar telur mikilvægt að horfa til fleiri þátta en vægis atkvæða þegar kosningafyrirkomulagið er mótað. Til dæmis þurfi að hyggja að aðgengi fólks að þingmönnum og þar með möguleikum þeirra til að hafa áhrif á störf þingsins í gegnum þingmenn sína. Einnig sé rétt að velta fyrir sér hvernig fyrirkomulag auðveldar stjórnarmyndun í landinu eftir kosningar.

Einar telur einnig vert að huga að því að kjördæmi verði ekki of stór. Ef landið yrði eitt kjördæmi yrði samband almennings við þingmenn talsvert verra.

Einar bendir á að hægt sé að draga ákveðinn lærdóm af stjórnlagaþingskosningunum þar sem landið var eitt kjördæmi. Af 25 fulltrúum komu aðeins tveir af landsbyggðinni, annar frá Akureyri og hinn úr Þingeyjasýslu. „Og vitaskuld kom það fram í áherslum sem birtast okkur í tillögum stjórnlagaráðsins. Það blasir við hverjum einasta lifandi manni," segir hann og nefnir til dæmis tillögurnar ráðsins um kjördæmaskipan.

Einar ræddi málin við þáttarstjórnendur útvarpsþáttarins Reykjavík Síðdegis á Bylgjunni, en hljóðbrotið má nálgast hér að ofan.