Eitt stærsta þjófnaðarmál frá upphafi þingfest

Eitt stærsta þjófnaðarmál sem komið hefur upp á Íslandi var þingfest í dag. Þar er mæðgum af víetnömskum uppruna gefið að sök að hafa stolið fatnaði, skóm og snyrtivörum fyrir um 14 milljónir króna.

Konurnar tvær huldu andlít sín vandlega þegar þær mættu fyrir dóm í morgun. Móðirin er 43 ára en dóttirin 19 ára gömul. Þær eru ekki taldar eiga sér vitorðsmenn.

Ákæran á hendur þeim er 32 blaðsíður sem mestmegnis eru hrein upptalning á þeim vörum sem lagt var hald á á heimili þeirra. Upp komst um konurnar í október á síðasta ári þegar þær voru staðnar að verki í Smáralind. Fréttastofa RÚV greindi þá frá því í nóvember að konurnar hefðu fóðrað poka með álpappír til að blekkja þjófavarnir í verslunum. Gerð var húsleit hjá þeim og fundust þar vörur að andvirði milljóna króna.

Alls eru konurnar ákærðar fyrir að hafa stolið 517 vörum. Þar á meðal 70 þúsund króna skór frá Boss, nokkrum fjörutíu þúsund króna kjólar frá Karen Millen, en líka nítján Colgate tannburstar, 6 Fruity varasalvar og þrennar naglaklippur. Samkvæmt upplýsingum frá lögreglu hefur aldrei komið upp viðlíka mál hér á landi.

Tíu fyrirtæki fóru upphaflega fram á bætur frá konunum en þar sem aðeins mættu fulltrúar tveggja þeirra, sem hæstu kröfurnar áttu, í morgun, og voru kröfur hinna látnar niður falla.

Þá eru konurnar einnig ákærðar fyrir fíkniefnabrot.

Þar sem mæðgurnar tóku ekki afstöðu til sakarefnisins í dag koma þær aftur hér í héraðsdóm reykjavíkur þann 17. september, og lýsa yfir sakleysi, eða sekt.