Íslendinga mega ekki fagna framförum of snemma

Íslendingar mega ekki fagna efnahagsframförum sínum of snemma þar sem enn á eftir að ná fram stjórnsýsluumbótum fyrir kosningar næsta vor. Þetta segja tveir fræðimenn í svari við grein Steingríms J. Sigfússonar efnahags- og viðskiptaráðherra í Financial Times í dag.

Það eru Robert Wade prófessor í hagfræði við London School of Economics og Dr. Sigurbjörg Sigurgeirsdóttir stjórnsýslufræðingur sem rita greinina í Financial Times í dag og birtist hún á heimasíðu blaðsins. Í greininni segja þau Steingrím J Sigfússon hafa sleppt því að minnast á tvo mikilvæga þætti í efnahagsbata Íslands í grein sinni í Financial Times á þriðjudaginn þar sem hann rekur hvað það var sem réði mestu um hvað Íslendingar komust farsællega í gegnum fjármálakreppuna haustið 2008.

Í fyrsta lagi minnist Steingrímur ekki á að í upphafi árs 2009 hafi 80 prósent fyrirtækja á fjórðungur heimila var með neikvæða eignastöðu og stjórnvöld hafi því gripið til 110 prósent leiðarinnar til að koma í veg fyrir gjaldþrot og eignaupptöku. Bankarnir hafi hagnast á því með því að geta stuðst við öruggt tekjustreymi og sloppið við að greiða skatta af eignum sem þeir höfðu tekið yfir.

Í öðru lagi hafi Alþjóðagjaldeyrissjóðurinn í aðgerðum sínum á Íslandi verið staðráðinn í að sýna nýja vinnuhætti eftir slæmt orðspor í Asíukreppunni með því að koma á gjaldeyrishöftum og fara varlega í niðurskurðaraðgerðir. Gengisfall krónunnar hafi hins vegar að mestu séð um aðlögunina.

Þá segja þau Robert og Sigurbjörg að mesta hættan sem stafar að íslensku efnahagslífi í dag séu Alþingiskosningarnar 2013. Stjórnvöld séu nú farin að fagna endurbótum í efnhaglífinu of snemma og gleymi þeim stjórnsýsluumbótum sem eftir á að samþykkja. Þar á meðal er ný stjórnarskrá og ný fiskveiðilöggjöf. Þau segja að ef Steingrími og hans samastarfsmönnum tekst að koma þessum breytingum íg egn fyrir kosningar þá muni það verða enn gagnlegri leiðarvísir fyrir leiðtoga Bretlands og evrusvæðisins.