Fleiri raftæki í Sorpu

Um þriðjungi fleiri raftæki hafa komið á endurvinnslustöðvar Sorpu á þessu ári miðað við það síðasta. Framkvæmdastjóri Sorpu segir þetta merki um að einkaneysla sé að aukast. Þá virðast fleiri standa í framkvæmdum en áður ef marka má það magn timburs sem komið er með á Sorpu.

Úrgangur sem komið er með á endurvinnslustöðvar Sorpu hefur aukist um fimmtung frá því á sama tíma í fyrra. Mismundandi er eftir flokkum hversu mikil aukning hefur orðið.

„Til dæmis sjáum við að rafeindatæki, til dæmis sjáum við að rafeindatæki og skjáir, þeir aukast um held ég 30% frá síðasta ári. Sem segir manni að einkaneysla virðist vera eitthvað að aukast," segir Björn Hafsteinn Halldórsson, framkvæmdastjóri Sorpu.

Þá hefur um fimmtungi meira komið af garðaúrgangi í sumar sem má líklega rekja til veðurblíðunnar.

„Síðan er hérna timbur það hérna hefur aukist um 20 og eitthvað prósent, ég man nú ekki alveg hvað. Það er sem sagt vísbending um ákveðnar framkvæmdir og þá framkvæmdir einstaklinga," segir Björn Hafsteinn Halldórsson, framkvæmdastjóri Sorpu.

Þá segist Björn tölur sýna að sífellt fleiri heimili eru farin að flokka pappa eftir að sveitarfélögin á höfuðborgarsvæðinu fóru að dreifa bláum tunnum í auknu mæli. Hann segir það geta munað tugum milljóna á ári fyrir sveitarfélögin í móttökugjöldum ef íbúa eru duglegir að flokka pappa.

Þá segir hann að þrátt fyrir aukna áherslu á að fólk flokki þá sé enn margir sem henda pappa og blöðum með heimilisorpinu.

„Þá er samt sem áður svona 20-25% af innihaldi tunnunnar pappi sem að er alveg hægt að endurvinna. Þannig það er heilmikið að sækja í endurvinnslutunnuna," segir Björn.