Forsætisráðherra Danmerkur lendir í hádeginu

Helle Thorning-Schmidt, forsætisráðherra Danmerkur, kemur til landsins í opinbera heimsókn í dag. Flugvél hennar lendir á Reykjavíkurflugvelli rétt fyrir klukkan tólf.

Jóhanna Sigurðardóttir, forsætisráðherra, mun taka á móti henni á Þingvöllum og verður fundur þeirra haldinn í Þingvallabústaðnum.

Ásta Ragnheiður Jóhannesdóttir, forseti Alþingis, tekur svo á móti henni síðdegis sama dag og sýnir henni húsakynni Alþingis.

Kvöldverður í boði forsætisráðherrahjóna verður í Þjóðmenningarhúsinu.

Helle Thorning-Schmidt heldur af landi brott á morgun til Grænlands.