Forsetinn sór embættiseið

Ólafur Ragnar Grímsson forseti Íslands sór embættiseið í fimmta sinn í þinghúsinu um klukkan tuttugu mínútur yfir fjögur í dag. Það var Markús Sigurbjörnsson, forseti Hæstaréttar, sem setti Ólaf Ragnar Grímsson í embætti. Hann gekk að því loknu á svalir Alþingishússins ásamt Dorrit Moussaieff forsetafrú þar sem hann bað menn að minnast fósturjarðarinnar.

Ólafur Ragnar sagði í ræðu sem hann hélt svo að nýafstaðnar kosningar hefðu verið gagnleg vegferð, skerpt sýn landsmanna á forsetaembættið, eflt samræður um heill og farsæld Íslendinga. „Á þessari stundu er því rétt að þakka öllum sem með framboði sínu og stuðningssveitum gerðu þjóðinni kleift að meta embættið, eðli þess og verkefni á vogarskálum sem æðstar eru í lýðræðisskipan, kosningum þar sem allir standa jafnfætis," sagði Ólafur Ragnar.

„Forsetakjör af slíkum toga er í takt við lýðræðiskröfur okkar tíma, fylgir þeim betur en viðhorfin sem löngum réðu för, að ekki væri við hæfi að etja kappi við forsetann, að hið fyrsta kjör skapaði hefðarrétt til langrar setu," bætti hann jafnframt við.

Ólafur Ragnar sagði að lýðræðiskjarni stjórnarskrár og tíðarandi nýrrar aldar væru ótvíræðar vísbendingar um að sérhver forseti eigi að fagna því að athafnir hans og orðræða séu vegin og metin við endurnýjun umboðsins, einkum þegar umdeildar ákvarðanir hafi verið dagskrárefni, forsetinn vísað lögum frá Alþingi í dóm þjóðarinnar.

Hér má lesa ræðu forsetans