Sýknuð af ákæru um 50 milljóna króna fjárdrátt

Héraðsdómur Reykjavíkur sýknaði í dag konu sem er fyrrverandi starfsmaður við einkabankaþjónustu á eignastýringarsviði Kaupþings af ákæru um að hafa dregið sér samtals 50 milljónir króna sem voru söluandvirði skuldabréfa og víxla sem konan aðstoðaði seljendur við að gefa út.

Konan millifærði söluandvirði verðbréfanna af bankareikningum kaupenda bréfanna inn á sinn eigin bankareikning í stað þess að ráðstafa því í þágu seljenda , eins og sagði í ákæru. Konan játaði að hafa lagt söluandvirði bréfanna inn á eigin reikning, en sagði að um hefði verið að ræða endurgreiðslu á lánum sem hún hafi veitt seljendum bréfana til kaupa á þeim.

Héraðsdómur Reykjavíkur segir að skýringar konunnar séu í samræmi við frásagnir eigenda þeirra félaga sem seldu bréfin, en þar var um að ræða félögin Yl-hús og Hraunbær 107. Þá segir Héraðsdómur Reykjavíkur jafnframt að ekki hafi farið fram nein rannsókn á því hvort fé vanti inn í sjóði félaganna. Bókhald þeirra virðist ekki hafa verið rannsakað nema að hluta til. Sönnunarbyrði hvíli að meginstefnu til á ákæruvaldinu og þar sem rannsókn málsins sé ekki tæmandi, sé ekki unnt að leggja eitthvað upp úr því að ákærða kveðst hafa glatað gögnum máli sínu til stuðnings. Það var á þessum forsendum sem Héraðsdómur sýknaði konuna.