Krafa Íra um refsiaðgerðir kann að spilla fyrir viðræðum

Krafa Íra um refsiaðgerðir vegna makrílveiða Íslendinga gerir ekkert annað en að spilla fyrir viðræðum, að mati Steingríms J. Sigfússonar. Sjávarútvegsráðherrar Evrópusambandsins ræddu makríldeiluna á fundi í dag.

Makríldeilan var rædd á fundi landbúnaðar- og sjávarútvegsnefndar ráðherraráðs Evrópusambandsins í dag. Írar kröfðust þar að Íslendingar verði beittir refsiaðgerðum vegna veiðanna. Írar benda meðal annars á að þeir telji makrílstofninn hafa minnkað við Íslandsstrendur og því eigi að draga enn meira úr hlut Íslendinga í makrílnum en hingað til hefur verið rætt um.

„Ég var nú búinn að sjá þessa greinagerð Íranna, hún er mjög áróðurskennd," segir Steingrímur J. Sigfússon, sjávarútvegsráðherra. „Þar er því haldið fram að það liggi eitthvað fyrir að makríllinn sé að ganga í minna mæli á Íslandsmiði í ár eða undanfarin ár. Það eru hreinar getgátur."

„Þvert á móti þá er vaðandi makríll hér suðaustan, sunnan og einkum vestan við landið og virðist vera mjög víða hér vestur af núna."

Þá telur Steingrímur heldur ekki horfa vænlega um lausn deilunnar ef Evrópusambandið og Noregur ætla að bjóða Íslendingum minni makrílkvóta en áður hefur verið talað um. Þá telur hann kröfu Íra um að refsiaðgerðum verði beitt gegn Íslendingum ekki hjálpa til við lausn deilunnar.

„Þetta er bara deila sem fyrst og fremst þarf að ræða og reyna að leysa við samningaborðið á efnislegum forsendum þar. Ég held það geri ekkert annað en að spilla fyrir að tala um refsiaðgerðir eða einhvern pólitískan þrýsting."