Íslendingar lýsa yfir stuðningi við hertar aðgerðir í Sýrlandi

Íslensk stjórnvöld lýsa yfir fullum stuðningi við hertar aðgerðir alþjóðasamfélagsins gagnvart Sýrlandi en tillaga þess efnis er nú til umfjöllunar á vettvangi öryggisráðs Sameinuðu þjóðanna að frumkvæði Bretlands, Bandaríkjanna, Frakklands, Portúgal og Þýskalands.

Í tilkynningu frá utanríkisráðuneytinu segir að Össur Skarphéðinsson utanríkisráðherra ítreki fordæmingu á framferði sýrlenska stjórnvalda og síauknum árásum vopnaðra sveita á þeirra vegum á almenna borgara. Voðaverk stjórnvalda í Sýrlandi brjóti í bága við alþjóðleg mannúðarlög og fyrri ályktanir öryggisráðsins. Þá segir að öllu ofbeldi verði að linna, hver svo sem ber ábyrgð á því.

„Ísland hvetur því öll aðildarríki öryggisráðs Sameinuðu þjóðanna til að sameinast um ályktunardrög sem lögð hafa verið fram af fyrrgreindum fimm ríkjum og kveða á um að gripið verði til þvingunaraðgerða kjósi sýrlensk stjórnvöld að framfylgja ekki tafarlaust ályktunum ráðsins.

Ísland styður áframhaldandi friðarumleitanir Kofi Annan og yfirlýsingu aðgerðahópsins um málefni Sýrlands sem samþykkt var á fundi hópsins hinn 30. júní síðastliðinn," segir í tilkynningunni.