Næstum eitt skemmtiferðaskip á dag

Höfuðborgarbúar hafa ekki farið varhluta af miklum fjölda skemmtiferðaskipa við hafnir borgarinnar í sumar. Alls koma 82 skip með 100 þúsund manns yfir sumarið. Það er næstum því eitt skip á dag miðað við tímabilið júní-september.

Í fyrra komu um 64 þúsund manns með skemmtiferðaskipum. Það er því rúmlega 56% aukning á einu ári. Að sögn Gísla Gíslasonar, hafnarstjóra Faxaflóahafna, eru skipin í raun ekki mikið fleiri en þau eru töluvert stærri og lengri.

Gísli segir að að efnahagsáhrifin af ferðamönnunum séu gífurleg. „Þetta eru eflaust svona 1,5 til 2 milljarðar allt í allt," segir hann. Árið 2009 eyddu ferðamenn á skemmtiferðaskipum um 76 evrum á dag, eða um 12 þúsund. Að sögn Ásgústs Ágústssonar, markaðsstjóra Faxaflóahafna, gengur sala í kring um ferðamennina vel, gengið er svipað og ekki ólíklegt að þeir eyði sambærilegum upphæðum í ár.

Auk þess er margs konar afleiddur hagnaður af skemmtiferðaskipum. Faxaflóahafnir taka hafnargjöld. Ríkið tekur vitagjöld og tollafgreiðslugjöld. Á skipin þarf að kaupa kost og olíu og margs konar þjónustu við að taka við rusl og dæla úr klósettum. „Ég sé bara út um gluggan hjá mér núna eru sjö bílar frá hreingerningarfyrirtæki að taka eitt skip í gegn," segir Ágúst. Greint hefur verið frá því að ferðamenn sjáist í tölum um farsímanotkun á landinu. Efnahagsleg áhrif ferðamannana eru því margslungin og víðferm.

Rekstraraðilar í veitingabransanum í Reykjavík hafa haft af því áhyggjur að öllu þessu ferðafólki sé mokað upp í rútur og því ekið beint út á land. Ágúst segir að það sé ekki raunin í öllum tilvikum. Það sé hins vegar rétt að milli 60-70% fari beint í ferðir út á land. Afgangurinn gangi hins vegar frá borði og spóki sig í Reykjavík.