Oddný hlakkar til kosningabaráttunnar

„Ég hlakka til að fara í kosningabaráttu með þennan öfluga hóp. Það verður gaman," segir Oddný Harðardóttir. Hún mun leiða lista Samfylkingarinnar í Suðurkjördæmi fyrir þingkosningarnar í vor. Oddný segist ætla að ná inn þremur mönnum í kjördæmunum. „Við erum þrjú og við höldum þeim í það minnsta," segir Oddný. Hún hafði betur en Björgvin G. Sigurðsson sem sóttist eftir þessu sama sæti.

Oddný segist vera mjög þakklát. „Ég er mjög þakklát bæði þeim sem kusu mig, en ekki síst þeim sem unnu með mér undanfarna daga," segir hún. Þar sé um mjög vaska sveit að ræða.

Oddný var á leiðinni frá Selfossi til Keflavíkur þegar Vísir náði tali af henni í kvöld, en hún ætlar að fagna með stuðningsmönnum í Keflavík í kvöld.