Markverðir HK hafa varið fleiri skot í öllum leikjunum

HK-ingar eru einum sigri frá fyrsta Íslandsmeistaratitlinum í sögu karlahandboltaliðs félagsins og geta tryggt sér hann með sigri á FH í Kaplakrika á sunndaginn. HK vann 3-0 sigur á deildarmeisturum Hauka í undanúrslitunum N1 deildar karla og er nú komið í 2-0 á moti Íslandsmeisturum FH í lokaúrslitunum.

Það eru ekki síst markverðirnir Björn Ingi Friðþjófsson og Arnór Freyr Stefánsson sem hafa staðið sig frábærlega í úrslitakeppninni. Björn Ingi varði yfir fimmtíu prósent skotanna sem komu á hann í fyrstu tveimur leikjunum á móti Haukum og hann varði einnig mjög vel í fyrsta leiknum á móti FH. Arnór var síðan stórbrotinn í öðrum leiknum á móti FH í gær þar sem hann varði 59 prósent skota sem á hann komu.

Í sameiningu hafa þeir Björn Ingi og Arnór Freyr séð til þess að markverðir HK hafa varið fleiri skot en markverðir mótherja þeirra í öllum fimm leikjum úrslitakeppninnar til þessa.

Markvarslan sem átti að mati einhverra að vera veikleiki HK-liðsins fyrir úrslitakeppnina hefur aftur á móti reynst vera helsti styrkleiki HK-inga. Hér fyrir neðan má sjá frábæra tölfræði markvarða HK í úrslitakeppninni til þessa.

Markverðir HK í úrslitakeppni N1 deildar karla 2012:

Undanúrslitaeinvígið við Hauka:

1. leikur 30-24 sigur á Ásvöllum

Varin skot hjá HK: 19

Varin skot hjá Haukum: 16/1

2. leikur 21-18 sigur í Digranesi

Varin skot hjá HK: 21/1

Varin skot hjá Haukum: 15/1

3. leikur 36-31 sigur á Ásvöllum

Varin skot hjá HK: 15

Varin skot hjá Haukum: 13

Úrslitaeinvígið við FH:

1. leikur 26-23 sigur í Kaplakrika

Varin skot hjá HK: 19/1

Varin skot hjá FH: 11

2. leikur 29-26 sigur í Digranesi

Varin skot hjá HK: 21/3

Varin skot hjá Haukum: 18/1



Markvarsla Björns Inga Friðþjófssonar:

Haukar, leikur 1: 16 (53%)

Haukar, leikur 2: 19 (51%)

Haukar, leikur 3: 8 (29%)

FH, leikur 1: 19/1 (45%)

FH, leikur 2: 2 (13%)

Samanlagt: 64/1 (42%)

Markvarlsa Arnórs Freys Stefánssonar:

Haukar, leikur 1: 3 (23%)

Haukar, leikur 2: 2/1 (100%)

Haukar, leikur 3: 7 (39%)

FH, leikur 1: Lék ekki

FH, leikur 2: 19/3 (59%)

Samanlagt: 31/4 (48%)