Vekja athygli á auglýsingum á þakviðgerðum

Neytendasamtökin vilja vekja athygli á auglýsingum frá Byggingarfélaginu Reisir ehf. sem auglýsa þakviðgerðir með svokallaðri Pace aðferð. Samtökin segjast hafa fengið nokkur mál inn á borð hjá sér þar sem illa hefur verið gengið frá viðgerðum á húsþökum hjá fólki.

„Maður nokkur fékk tilboð í Pace gúmmíhúðun á þak húss síns frá Reisi ehf. Tilboðið hljóðaði upp á rúmlega 600.000 kr. og lagði fyrirtækið mikla áherslu á 10 ára ábyrgð og skjót viðbrögð við kvörtunum.

Eftir að þakið hafði verið hreinsað og húðað með grárri Pace gúmmíhúð kom í ljós að vinnan var ekki fullnægjandi þar sem allvíða sást í rauðar skellur og á mörgum stöðum sást í rauða naglahausa, en þakið var rautt fyrir. Maðurinn hringdi þá í Reisi ehf. og var starfsmaður sendur á staðinn sem viðurkenndi að illa hefði verið að verki staðið og eyddi heilum degi í að bletta það sem þurfti. Fljótlega kom í ljós að þakið hafði verið blettað með aðeins ljósari lit og er því allt í ljósum skellum. Maðurinn hafði aftur samband við Reisi ehf. og kvartaði en var tjáð að þetta tæki tíma að jafna sig sem það hefur þó enn ekki gert. Maðurinn sendi tölvupósta til fyrirtækisins en hafði ekki erindi sem erfiði og leitaði því næst aðstoðar Neytendasamtakanna," segir vef samtakanna.

Neytendasamtökin hafa sent þrjú bréf til fyrirtækisins sem öll voru endursend og þá hafa forsvarsmenn fyrirtækisins ekki látið ná í sig.

Neytendasamtökin segja að það sé undartekning að seljendur sýni ekki samstarfsvilja þegar kemur að því að leysa úr ágreiningi. Í ljósi þessa geta þau ekki mælt með því að fólk eigi viðskipti við fyrirtækið.