Jón Arnór stigahæstur á móti Barcelona

Jón Arnór Stefánsson var stigahæstur hjá CAI Zaragoza í tapleik á móti stórliði Barcelona á heimavelli í spænsku úrvalsdeildinni í körfubolta um helgina. Barcelona er á toppi deildarinnar og vann leikinn með 19 stigum, 68-49.

Jón Arnór skoraði 13 stig á 29 mínútum en níu stiga hans komu af vítalínunni. Jón setti niður öll vítin sín en hitti aðeins úr 2 af 7 skotum utan af velli. Charles Rhodes, ný Bandaríkjmaður í liðinu kom næstu Jóni með 11 stig.

CAI Zaragoza er í tíunda sæti þegar sex umferðir eru eftir en liðið er einum sigri frá áttunda og síðasta sætinu inn í úrslitakeppnina. Næstu tveir leikir eru á móti liðum fyrir neðan þá í töflunni og Zaragoza-liðið verður að vinna þá ætli þeir sér inn í úrslitakeppnina.