Brynjar Níelsson: Hvaða starfsmaður sem er hefði getað lent í árásinni

„Starfsfólkið er í áfalli," sagði Brynjar Níelsson, formaður Lögmannafélags Íslands, en hann starfar á sömu skrifstofu og hnífaárásin átti sér stað í morgun. Hann sagði í samtali við fréttastofu að skrifstofunni verði lokað í dag vegna rannsóknar lögreglu og verður áfram næstu daga.

Það var ljóst að Brynjari var verulega brugðið eins og öðrum starfsmönnum eftir að karlmaður stakk framkvæmdastjóra Lagastoða margsinnis. Sá liggur þungt haldinn á Landspítalanum og gengst nú undir aðgerð.

Samstarfsmaður fórnarlambsins, Guðni Bergsson, var stunginn tvívegis í lærið þegar hann kom honum til bjargar.

„Hvaða starfsmaður sem er hefði getað lent í þessu," sagði Brynjar um árásina en svo virðist sem árásarmaðurinn hafi óskað eftir viðtali á skrifstofunni. Brynjar segir engan kannast við manninn á stofunni, og svo virðist sem maðurinn hafi ekki átt sér forsögu á stofunni.

Brynjar lýsti því þannig að maðurinn hefði óskað eftir viðtali og svo virðist sem tilviljunin ein hafi ráðið því að hann réðist á fórnarlambið.

„Maður veltir því fyrir sér hvernig svona lagað geti gerst um hábjartan dag,“ sagði Brynjar.

Ekki er vitað hvað árásarmanninum gekk til. Hann er í haldi lögreglunnar og enn á eftir að yfirheyra hann samkvæmt upplýsingum frá lögreglu.