Segir málsmeðferð í máli Gunnars bera keim af sýndarréttarhöldum

Skúli Bjarnason, lögmaður Gunnars Þ. Andersen, telur að málsmeðferð FME í máli umbjóðanda hans beri keim af sýndarréttarhöldum. Hann telur að stjórn FME hafi ekki nema að litlu leyti svarað spurningum sem hann lagði fram fyrir hönd Gunnars og áréttar ósk um á hvaða nýju gögnum ákvörðun stjórnarinnar sé byggð. Þá furðar hann sig á heimsókn dökkhærðrar konu á skrifstofu sinni, sem birtist þar með ómerkt gögn.

Gunnari var tilkynnt um fyrirhugaða uppsögn, sem taka átti gildi um næstu mánaðarmót með sex mánaða uppsagnarfresti, í boðsendu bréfi sem honum barst sl. föstudagskvöld. Í kjölfarið hafa vaknað spurningar um lögmæti ákvörðunar stjórnar FME, en lögmaður Gunnars hefur óskað eftir upplýsingum um á hvaða nýju gögnum stjórnin byggði ákvörðun sína að segja Gunnari upp störfum.

„Í gær barst á skrifstofu mína í ómerktu umslagi skjalabunki sem telur 123 blaðsíður, glærukynningar, skýrslur, fundargerðir o.fl. Ekkert fylgibréf var heldur með sendingu þessari. Aðspurður kvaðst sendiboðinn, liðlega þrítug dökkhærð kona, vera frá FME. Staðfesting óskast á því að svo sé. Öll voru þessi gögn kunnugleg og virðast stafa frá rannsókn Andra Árnasonar nr. II," segir Skúli í bréfi sínu sem hann sendi stjórn FME í dag, en bréfið er svar við bréfi stjórnar FME sem sent var sl. sunnudagskvöld.

Þarna er Skúli að vitna til álitsgerðar Andra sem tvívegis komst að þeirri niðurstöðu að ekki væri ástæða til að gera athugasemdir við hæfi Gunnars sem forstjóra FME.

Skúli segir að ekki liggi fyrir hvað af þessum gögnum, sem hann fékk í gær, hafi eða eigi að hafa sett mál Gunnars í einhverjan nýjan farveg.

Þá spyr Skúli hvort málið sé enn til rannsóknar. Þeirri spurningu sé algjörlega enn ósvarað. Þá segir Skúli að stjórn FME hafi ekki enn svarað því hvers vegna hún telji niðurstöðu Ástráðs Haraldssonar hrl. og Ásbjarnar Björnssonar endurskoðanda hafa meira vægi en álitsgerðir Andra Árnasonar. „Þessari spurningu er auðvitað enn ósvarað. Hún er auðvitað enn áhugaverðari í ljósi þess að Andri aflaði þó sjálfstætt fjölmargra gagna í sinni rannsókn en Ástráður engra," segir Skúli í bréfinu.

Þá segir Skúli að stjórn FME hafi ekki svarað fyrri andmælum Gunnars, sem Gunnar sendi þegar unnið var að álitsgerð þeirra Ástráðs og Ásbjarnar. Skúli segir að ekkert tillit hafi verið tekið til þessara andmæla og þeirra hafi ekki einu sinni verið getið. „Óneitanlega ber þessi málsmeðferð keim af svokölluðum sýndarréttarhöldum. Það virðist sem svo að þeir Ástráður og Ásbjörn hafi hvorki leitað nýrra gagna né hirt um að kanna sannleiksgildi staðhæfinga umbjóðanda míns um grundvallaratriði þessa máls, þ.e að fyrir hartnær 11 árum var það niðurstaða ítarlegrar skoðunar að það væri réttara að telja umrædd félög ekki með. Væri þetta skoðað til fulls fellur að sjálfsögðu hinn meinti blekkingarþáttur og málatilbúnaðurinn hrynur," segir Skúli. Þá fer hann fram á að málið verði fellt niður.