Rannsókn á tildrögum sjóslyssins hafin

Rannsókn á tildrögum slyssins sem varð þegar Hallgrímur SI-77 sökk út frá ströndum Noregs er hafin, hún fer fram á Íslandi og verður í höndum rannsóknarnefndar sjóslysa. Lögregla og björgunaraðilar í Noregi vinna nú við að safna gögnum og verða þau send hingað til lands. Þar er til dæmis um að ræða veðurspár undanfarna daga, skýrslur frá björgunaraðilum og lögreglu.

Jón Arilíus Ingólfsson forstöðumaður nefndarinnar býst við að fá þau í fyrsta lagi eftir helgi en auk þess að vinna úr norsku upplýsingunum verður skýrsla tekin af sjómanninum sem komst lífs af en vonir eru bundnar við að hann geti varpað ljósi á atburðarrásina.

„Ef að til dæmis það gerist eitthvað sérstakt, ef það er leki, eða skipið fær á sig sjó til þess að eitthvað sem verður til þess að eitthvað áfall gerist þá tekur þetta einhverjar mínútur. Þá átta menn sig á því hvað hafi gerst og við erum að vona að það sé svo í þessu tilfelli," segir Jón.

Togarinn var skoðaður af siglingastofnun í janúar og fékk í kjölfarið útgefið haffæraskírteini fram í maí. Það þýðir að togarinn var sjófær og mátti sigla úr höfn með áhöfn. Hann hafði staðið ónotaður við bryggju á Siglufirði í nokkra mánuði áður en hann lagði af stað til Noregs síðastliðinn sunnudag.

„Okkur skilst að það hafi verið litð eftir því þar og hugsað um það þennan tíma og við vitum að það var skoðað af Siglingastofnun nú í janúar og það hafi fengið haffærisskirteini þar og fram í maí," segir Jón. Skipið hafi því verið sjófært og mátt sigla úr höfn.

Jón segir að mönnunin á skipinu hafi verið í lagi. „Þetta hefur bara verið siglingin frá Íslandi til Noregs og ég held að sú mönnum hafi verið allt í lagi til þess. Það var ekki neitt annað. Þeir voru ekki að fara að fiska eða með neinn flutning eða neitt slíkt – þetta hefur bara verið lágmark miðað við þessa ferjusiglingu," segir Jón.

Skýrsla verður tekin af manninum sem lifði af strax og hann kemur til landsins.