Leik lokið: Króatía - Ísland 31-29 | Naumt og svekkjandi tap

Ísland tapaði fyrsta leik sínum á EM í Serbíu í kvöld er það mætti sterku liði Króatíu og tapaði, 31-29, eftir æsispennandi lokamínútur.

Ísland var með forystu í hálfleik, 15-14, og skrefinu framar lengst af í leiknum. En Króatar náðu með öflugum varnarleik og frábærri markvörslu Mirko Alilovic að síga fram úr á lokamínútunum og tryggja sér sigur.

Strákarnir spiluðu glimrandi vel fyrstu 50 mínútur leiksins og vory í forystu nánast allan fyrri hálfleikinn. Sóknarleikurinn var góður og eftir rólega byrjun náði Björgvin Páll að komast í takt við leikinn og verja nokkur góð skot.

Varnarleikurinn var ágætur á köflum en hefur oft verið betri. Sverre Jakobsson fékk snemma tvær brottvísanir í leiknum sem setti strik í reikninginn en strákarnir náðu oftast að svara fyrir sig í sókninni og halda þannig undirtökunum í leiknum.

Meira jafnræði var með liðunum í seinni hálfleik og jafnt á flestum tölum. Ísland var þó alltaf fyrri til að skora en þetta snerist svo við á síðustu mínútunum. Denis Buntic kom Króötum yfir þegar rúmar tvær mínútur voru eftir, 29-28, og strákarnir lentu á vegg þegar þeir reyndu að sækja gegn króatísku vörninni. Þeir voru þvingaðir í erfið skot sem Alilovic varði næsta auðveldlega.

Ivano Balic gerði ekki mikið í leiknum en hann fiskaði þó dýrmætt víti þegar mínúta var eftir og Ivan Cupic tryggði Króötum sigurinn með því að skora úr því.

Óvenjulegt var að sjá að línumönnunum Róberti Gunnarssyni og Kára Kristjáni Kristjánssyni tókst ekki að skora í dag þrátt fyrir nokkur dauðafæri. En fleiri mistök voru gerð á báðum endum vallarins sem reynast dýrkeypt í svona jöfnum leik.

Miðað við spilamennskuna í dag er þó full ástæða til að vera bjartsýnn fyrir hina tvo leikina. Króatar eru með gríðarlega sterkt lið og ætla sér sjálfsagt að fara langt á þessu móti eins og á öllum öðrum. Næsti leikur Íslands er gegn Noregi á miðvikudag og nú dugar ekkert annað en sigur.