Alexander: Við neituðum að gefast upp

"Ég veit ekki alveg hvernig við fórum að þessu. Við bara neituðum að gefast upp og gáfum allt sem við áttum í þennan leik til enda," sagði baráttujaxlinn Alexander Petersson eftir sigurinn ótrúlega gegn Norðmönnum.

Alexander hefur oft leikið betur með landsliðinu og var alls ekki sáttur með sjálfan sig.

"Ég var bara ekki með í þessum leik. Þetta var mjög erfiður leikur fyrir mig. Hausinn var ekki í lagi hjá mér í dag, því miður," sagði Alex sem gat þó leyft sér að brosa yfir þessum stórbrotna sigri.

"Bjöggi varði undir lokin fyrir okkur og svo unnum við með tveimur. Þetta var fáranlegur endir á þessum leik. Við unnum og það var lífsnauðsynlegt fyrir okkur að vinna. Ég mun svo mæta með hausinn í lagi í næsta leik."