Uppgjörið eftir Sandy: "Nú vill fólk aðeins hugsa um fjölskyldur sínar“

Stormurinn Sandy gekk á land á austurströnd Bandaríkjanna í gærkvöld. Það er fyrst núna sem Bandaríkjamenn finna fyrir afleiðingum veðurofsans. Íslendingur sem búsettur er í New York segir fólk nú einblína á öryggi sinna nánustu.

„Nóttin var ekki svo slæm hjá okkur," segir Brynjólfur Stefánsson, bankamaður hjá Morgan Stanley og New York búi. „Það var gríðarlegur vindur. Tré rifnuðu upp og brotnuðu. En þetta var auðvitað verra fyrir þá sem búa neðar."

Veðurofsinn í gærkvöld og nótt hefur valdið víðtæku rafmagnsleysi í Bandaríkjunum. Rúmlega átta milljón manns eru nú án rafmagns.

„Það eru margir að kljást við rafmagnsleysið núna. Mér skilst að það séu um 740 þúsund manns í New York án rafmagns. Það fór þó ekki hjá okkur," segir Brynjólfur.

Að sama skapi hafa samgöngur víða farið úr skorðum. Loka þurfti brúm og göngum í New York — ljóst er að lestarkerfi borgarinnar varð fyrir stórfelldum skemmdum. Þá þurfti að aflýsa rúmlega 12 þúsund flugferðum.

„Fyrst og fremst er það lestarkerfið sem er í ólagi. Þetta eru líklega mestu hamfarir sem lestarkerfið í New York hefur gengið í gegnum. Það gæti tekið um fjórtán daga að koma því í lag. Þetta eru viðkvæm kerfi og saltvatnið getur haft afar slæm áhrif."

Stormurinn Sandy var fyrsta stigs fellibylur áður en hann gekk á land í New Jersey seint í gærkvöld. Eyðileggingin er gríðarleg og hafa ráðamenn í bæði New York og New Jersey sagt storminn vera þann versta í sögunni.

Staðfest tala látinna í Bandaríkjunum er 26. Þegar litið er á mannfallstölur frá því að Sandy reið yfir Karíbahafið er ljóst að heildartala látinna er yfir hundrað. Þá brunnu hátt í hundrað hús til kaldra kola í Queens, einu af fimm úthverfa New York.

„Nú hugsar fólk aðeins um fjölskyldur sínar og sína nánustu," segir Brynjólfur að lokum.