Ævintýrabók valin sú besta

Það voru þeir Snæbjörn Brynjarsson og Kjartan Yngvi Björnsson sem hlutu Íslensku Barnabókaverðlaunin í morgun fyrir bók þeirra, Hrafnsauga. Bókin er sú fyrsta í þríleiknum Þriggja heims saga sem myndi flokkast undir ævintýrabókmenntir.

Höfundarnir eru jafnaldrar en þeir eru fæddir árið 1984. Kjartan er bókmenntafræðingur og Snæbjörn er leikhúsfræðingur auk þess sem hann stundar nám í japönsku.

Sextíu handrit bárust til dómnefndar. Fyrir sigurinn fá höfundarnir hálfa milljón króna en bók þeirra kom einnig úr prentun í morgun og fengu þeir hana í hendur í Austurbæjarskóla í miðborg Reykjavíkur þegar afhendingin fór fram.

Á síðasta ári var það Bryndís Björgvinsdóttir sem fékk þessi verðlaun.