Fimleikamenn þurfa meira pláss

Alls staðar vantar meira húsnæði til fimleika en sprening hefur verið meðal ungmenna á íþróttinni undanfarinn ár. Formaður Fimleikasambands Íslands segir sveitarfélögin ekki hafa brugðist við þessum vaxandi áhuga.

Við greindum frá því á föstudaginn að fimleikar njóta vaxandi vinsælda meðal barna hér á landi.

Reyndar eru vinsældirnar svo miklar að fimleikafélögin anna ekki eftirspurn. Þannig eru Fjórtán hundruð börn eru skráð fyrir haustið í fimleikadeild Gerplu. Þar þurfti einnig að hætta að skrá börn inn biðlista strax eftir Verslunarmannahelgi því þá var þegar búið að skrá meira en eitt þúsund börn sem dreymir um að æfa fimleika - sum þeirra hafa beðið í þrjú ár.

Jón Finnbogason, formaður Gerplu, sagði því í viðtali við fréttastofu um málið að þótt hann fagnaði vaxandi vinsældum fimleika væri það mjög hryggilegt að geta ekki tekið á móti nándar nærri öllum áhugasömum börnum vegna húsnæðisskorts. Vonaðist hann til þess að sveitarfélögin myndu bregðast við stöðinni.

Þorgerður Laufey Diðriksdóttir, formaður Fimleikasambands Íslands, segir öll fimleikafélög landsins glíma við húsnæðisskort vegna vaxandi áhuga barna á íþróttinni um þessar mundir þrátt fyrir að miklar nýlegar fimleikahallir hafi verið byggðar á þensluárunum víða um landi.

„Þrátt fyrir þetta er húsnæðið sem félögin og deildirnar búa yfir of lítið miðað við þá aðsókn sem er í fimleika í dag," segir Þorgerður.

Hún segir að einnig skorti á nýliðun meðal þjálfara en Fimleikasambandið hafi ávallt lagt mikla áherslu á þjálfun þeirra. Húsnæði og þjálfarakostur verði að haldast í hendur en því miður hafi það ekki gert það undanfarið.

„Fyrst og fremst er það plássleysið. Það er alveg ljóst að þau íþróttahús sem eru til staðar í sveitarfélögum eru umsetin. Það er auðvitað verið að stunda íþróttir í þessum húsum langt fram á kvöld," segir hún.

Þær íþróttir sem þurfi sérstaka aðstöðu, líkt og fimleikar séu í vondri stöðu. Hún segir að sér þyki sveitarfélögin ekki bregðast nægilega við stöðunni.

„Þau sjá náttúrlega að þarna er gríðarlega flott og vandað æfingahúsnæði. En hins vegar er þetta svo umsetið að plássið sem hver einstaklingur hefur í þessu húsnæði er of lítið. Við gætum notað húsnæði sem er ekki alveg á þessum standard en við þurfum bara meira pláss," segir Þorgerður.