Mörður vill ræða um skipulagsmál vegna náttúrváar

Mörður Árnason, þingmaður Samfylkingarinnar, hefur óskað eftir að haldinn verði sem fyrst fundur í umhverfis- og samgöngunefnd alþingis um ráðstafanir í skipulagsmálum vegna náttúruvár.

Sérstaklega verði hugað að áhættumatsþætti almannavarna við skipulag byggðar, vegna flóða, eldsumbrota, ofsaveðurs o.s.frv.

Mörður hefur meðal annars lagt til að á fundinn verði fengnir að minnsta kosti þeir Víðir Reynisson, verkefnafulltrúi á almannavarnadeild ríkislögreglustjóra, og Stefán Thors skipulagsstjóri.

Einnig verði fjallað um framtíðarverkefni Ofanflóðasjóðs í þessu samhengi.

Óskin um þingnefndarfund grundvallast á viðtali við Víði Reynisson á Bylgjunni í kjölfar ofsaveðursins á austurströnd Bandaríkjanna.