Áætlað að ný brú yfir Elliðarárósa kosti 230 milljónir

„Við lítum á þetta sem framfaramál fyrir hjólreiðarfólk, og þetta er líka táknrænt fyrir aukna áherslu á þennan ferðamáta," segir Dagur B. Eggertsson, formaður Borgarráðs Reykjavíkurborgar.

Í dag gaf ráðið heimild til að bjóða út verk í nýja hjóla- og gönguleið yfir Elliðarárósa sem verður opnuð 3. maí árið 2013. Áætlað er að verkið kosti um 230 milljónir króna.

Byggðar verða tvær göngu- og hjólabrýr yfir Elliðaárósa, þær tengdar við stígakerfið og lagður göngu- og hjólastígur milli þeirra yfir norðurenda Geirsnefs. Brýrnar verða um 36 metra langar og breidd brúargólfs um 4,5 metrar. Yfir vesturkvíslina verður brúað með uppfyllingu en engar þrengingar verða í austurkvísl.

Dagur segir að leiðin sé einn fjölfarnasti punkturinn á höfuðborgarsvæðinu, þar sem fólk hjólar í vinnuna. „Og í síðasta Hjólað í vinnuna-átaki bárust flestar ábendingar til okkar um hvað mætti betur fara á þessum stað. Við erum stolt af því að bjóða þetta út um helgina," segir Dagur.

Nánar um málið á vefsíðu Reykjavíkurborgar.