Enn verið að gera upp Suðurlandsskjálftann

Íbúar á Suðurlandi hafa fengið 10,6 milljarða króna í bætur vegna Suðurlandsskjálftans 2008 og enn á eftir að gera upp nokkur tjón. Íbúi í Hveragerði er ekki sáttur við matsmenn Viðlagatryggingar, sem hann segir að hafi það eina hlutverk að sálgreina sig og kalla sig síðan bjána á eftir. Opinn fundur var á Hótel Selfossi í gærkvöldi á vegum Viðlagatryggingar þar sem farið var yfir það sem gerst hefur eftir stóra Suðurlandsskjálftann 29. maí 2008. Mikið tjón varð í skjálftanum enda búið að greiða mikla fjármuni til tjónþola. "Við erum með um það bil 2400 fasteignatjón, sem eru s.s. tjón á vátryggðum fasteignum. Og við erum með um það bil 2600 lausafjártjón minnir mig. Og við erum samtals búin að borga tæplega 10,6 milljarða vegna þessara tjóna,“ segir Hulda Ragnheiður Hreiðarsson, framkvæmdastjóri Viðlagatryggingar. Og fólk er enn að tilkynna tjón? spyr fréttamaður. "Já, það hefur verið núna aðeins að tínast inn. Ég held við séum með rúmlega þrjátíu tjón í meðferð núna sem hafa verið tilkynnt á þessu ári,“ segir Hulda. Húsnæði Guðlaugs Lárussonar við Heiðarbrún 17 í Hveragerði skemmdist mikið í skjálftanum. Hann hefur ekki enn fengið að fullu úrlausn sinna mála og er afar ósáttur við matsmenn Viðlagatryggingar, sem hafa heimsótt hann reglulega. "Það eru kærulausir, óvandaðir menn sem eru að skoða eignir sem fara illa í hamförum. Og ég hef aldrei skilið ástæðuna fyrir því þeir reyna að gera sem minnst úr hlutunum og horfa alltaf í aðra átt en á skemmdina. Þeir horfa ekki á skemmdina, þeir horfa í hina áttina og fara að tala um eitthvað annað. Eins og ég er margoft búinn að vera fyrir, og þá fóru þeir að reyna að sálgreina mig og reyna að hafa áhrif á mig, að ég væri bara bjáni og ekkert að marka það sem ég sæi,“ segir Guðlaugur. Guðlaugur ætlar ekki að gefast upp að berjast fyrir rétti sínum. "Ég vil bara að þeir skoði málin. Ég vil ekkert annað. Ég vil bara heiðarleika og sannleika. Ég er ekki að biðja um ölmusu,“ segir hann.