Segir frábær bókajól í vændum

Það eru frábær bókajól í vændum. Þetta segir Bryndís Loftsdóttir, bóksali hjá Eymundsson. Nú lítur út fyrir að 950 bókatitlar muni skila sér í verslanir fyrir jólin, en það er sambærilegt við það sem hefur tíðkast síðustu ár.

„Bókabúðir eru staðir bjartsýninnar á Íslandi," segir Bryndís. „Það er svo ótrúlegt að ár eftir ár, í gegnum þessa kreppu, þá skuli útgefendur leggja í þetta ævintýri." Nú eru bókabúðir að fyllast af titlum og þeir eru síst færri en síðustu ár.

Bryndís segir stöðu íslensku bókarinnar sterka og hún seljist vel. Því þurfi enginn að örvænta að allir þessir titlar dagi uppi á lager í bókabúðum, þeir muni eflaust ganga út.

Bryndís segir bókaárið nokkuð spennandi í þetta sinn og telur ekki ólíklegt að ný nöfn verði tilnefnd til íslensku bókmenntaverðlaunanna. „Ég ætla að spá því. Það er svo mikið af nýjum krökkum að koma fram í bókmenntunum. Það verða eflaust ný nöfn sem við þekkjum ekki sem slá í gegn," segir Bryndís Loftsdóttir í útvarpsþættinum Reykjavík síðdegis á Bylgjunni í dag. Innslagið má nálgast á hlekknum hér að ofan.