Mikið tjón í eldsvoða við Óseyrarbraut í nótt

Allt tiltækt slökkvilið af höfuðborgarsvæðinu var kallað að sambyggðum fiskvinnsluhúsum við Óseyrarbraut í Hafnarfirði, eftir að lögreglumenn á eftirlitsferð urðu varir við eld í húsinu, laust fyrir klukkan tvö í nótt.

Húsið var þá mannlaust. Sótt var að eldinum úr öllum áttum til að hefta útbreiðslu hans og tókst það að mestu. Reykkafarar voru sendir inn við erfiðar aðstæður og urðu miklar sprengingar í rafmagns-tengikössum, en engan sakaði.

Allir sjúkraflutningamenn voru tiltækir strax í upphafi og Kallað var út aukalið. Hátt í 60 slökkviliðsmenn voru að störfum þegar flest var, en slökkvistarfinu lauk seint á fimmta tímanum í morgun.

Að sögn Þóris Steinarssonar vaktstjóra vildi svo vel til að vindur var hægur í nótt, sem auðveldaði slökkvistarfið. Ljóst er að mikið tjón hefur orðið bæði á húsum, búnaði og hráefni, sem þar var, en eldsupptök eru ókunn.