Hljóta að hækka laun almennra bankamanna um tveggja stafa tölu

Framkvæmdastjóri Samtaka starfsmanna fjármálafyrirtækja segir launahækkanir bankastjóra einkabankanna þýða að væntanlega verði hægt að hækka laun almennra starfsmanna bankanna um tveggja stafa tölu í komandi kjarasamningum.

Upplýst hefur verið að bankastjórar Arion og Íslandsbanka hafa tæpar þrjár milljónir króna í mánaðrlaun en þeir bankar eru að mestu í eigu kröfuhafa bankans. Laun bankastjóra Landsbankans sem er að mestu í eigu ríkisins eru hins vegar rúm milljón.

Friðbert Traustason framkvæmdastjóri Samtaka starfsmanna fjármálafyrirtækja segir þessar launatölur koma nokkuð á óvart. Honum skiljist að þessi laun hafi verið ákveðin eftir að stjórnir bankanna hafi skoðað launakjör stjórnenda fjörtíu stærstu fyrirtækja á Íslandi. Laun bankastjóranna séu í samræmi við það. Laun almennt  hafi einungis hækkað um 2,5 prósent frá hruni.