Fjölmiðlum meinað að fylgjast með hreinsunaraðgerðum

Einn slökkviliðsbíll og allnokkrir starfsmenn slökkviliðsins vinna að því að koma upp flotgirðingum í sjónum við Örfirisey, en á bilinu fimmhundruð til þrjúþúsund lítrar af svartolíu láku ofan í sjóinn úr togaranum Eldborg sem er gerður út frá Tallinn í Eistlandi, sem þar liggur við festar við höfnina í Örfirisey, um klukkan þrjú í dag. Ekki er ljóst með hvaða hætti slysið varð.

Samkvæmt fréttamanni fréttastofunnar þá er viðbúnaður ekki jafn mikill og ætla mætti. Svæðið, sem er eign Skeljungs og Olíudreifingar er lokað. En öryggisvörður á þeirra vegum taldi sig ekki hafa heimild til þess að hleypa fjölmiðlum inn á svæðið til þess að mynda hreinsunaraðgerðir slökkviliðsins.

Vinnan gengur hægt samkvæmt varðstjóra slökkviliðsins en búist er við að aðgerðin muni standa í einhverjar klukkustundir til viðbótar.