Spellerberg: Komnir í bestu mögulegu stöðu

„Við erum búnir að koma okkur í bestu mögulegu stöðu fyrir milliriðlana, höfum unnið fimm góða sigra og gætum ekki verið ánægðari en við erum núna. Við höfum náð að láta þá hluti ganga upp sem þurfti svo við kæmumst í þessa stöðu og nú þurfum við að taka þá með okkur í milliriðlana." sagði Bo Spellerberg leikmaður Dana eftir öruggan sigur Dana gegn Króötum í Malmö í kvöld.

Sóknarleikur Dana gekk vel og í seinni hálfleik leit á köflum út eins og þeir gætu skorað að vild. Spellerberg vildi þó ekki meina að leikurinn hefði verið auðveldur.

„Það er aldrei auðvelt að mæta Króatíu. Aftur á móti léku margir hjá okkur vel og þetta var besta frammistaða Kasper Söndergaard sem ég hef séð af hans hálfu og það gerði hlutina auðveldari fyrir okkur hina. Auk þess fékk Mikkel Hansen nokkur auðveld skot og svo gerum við alltaf mörk úr hraðaupphlaupum."

"Þannig að vissulega koma upp stöður þar sem við skorum auðveld mörk en við lentum einnig í vandræðum þegar við vorum sex á móti sex í sókninni því Króatar eru með gott varnarlið," bætti Spellerberg við.

Í seinni hálfleik áttu Króatar ekkert svar við hröðum leik Dana auk þess sem vörnin og markvörðuinn Niklas Landin hrukku í gang.

„Vörnin spilaði sérstaklega vel í seinni hálfleik og ég tel að þar höfum við unnið leikinn. Niklas tók nokkur skot og vörnin sömuleiðis og þá eflast menn. Það varð allt betra og betra eftir því sem á leið"

Fyrir mótið vildu Danir ekki setja sér há markmið en það gætu þeir þurft að endurskoða.

„Okkar markmið var að lenda í sjö efstu sætunum og ná þar af leiðandi sæti í umspili um sæti á Ólympíuleikunum. Nú eigum við góða möguleika á að ná enn lengra en við vitum að við munum mæta þremur sterkum liðum og að við þurfum að vinna tvo leiki til að ná í undanúrslit. Ekkert er öruggt og við þurfum að taka einn leik í einu."

Danir fara nú í milliriðil þar sem þeir mæta meðal annars heimamönnum Svía, en fjölmiðlar hafa reyndar fjallað um að stuðningsmenn Dana hafi keypt upp næstum alla miða á þann leik.

„Við erum nánast á heimavelli hér. Nánast hvar sem er sem þú spilar við Króata eru margir áhorfendur á þeirra bandi en það heyrðist ekkert í þeim í dag. Það er eðlilegt að fjölmiðlar byrji nú að fjalla um leikinn okkar gegn Svíum í milliriðlinum en við eigum Pólverja í fyrsta leik og svo Argentínu en auðvitað viljum við vinna Svía hér í Svíþjóð," sagði hinn öflugi Bo Spellerberg að lokum.