Arion banki: Íbúaverð mun hækka um átján prósent á næstu tveimur árum

Íbúðaverð mun hækka um átján prósent á næstu tveimur árum að mati greiningardeildar Arion banka. Hvati til nýbyggingar verður enginn ef spár Seðlabankans um verðlækkun gengur eftir segir hagfræðingur bankans.

Greiningadeildin spáir því að framboð á íbúðarhúsnæði eigi ekki eftir halda í við eftirspurn á næstu árum þar sem útlit sé fyrir nánast enga nýbyggingu vegna hás byggingarkostnaðar. Byggingarverktakar þurfi að sætta sig við minni framlegð á komandi árum þar sem meðalfermetraverð íbúðarhúsnæðis verði ríflega 10% yfir meðalbyggingarkostnaði árið 2013.

Greiningardeild spáir 18% verðhækkun á íbúðarmarkaði á nafnvirði frá deginum í dag til ársins 2013 vegna umframeftirspurnar, en sú spá gengur þvert á þá spá sem unnin var fyrir Íslandsbanka fyrr í mánuðinum, þar sem gert er ráð fyrir 30-50% lækkun, auk þess sem Seðlabankinn gerir ráð fyrir frekari lækkun fasteignaverðs.

„Eins og ég sé þetta þá er enginn hvati til staðar. Þegar ég segi verðhækkun á það ekki við allar íbúðir," segir Davíð Stefánsson, hagfræðingur hjá greiningadeild Arion Banka.

Í ljósi þess að lítið svigrúm er fyrir hækkunum á markaði telur greiningardeildin nauðsynlegt að ná byggingarkostnaði niður til að koma nýbyggingum af stað og mæta þannig eftirspurn.

„Ég held að það sé erfitt að lækka veriðið mikið. En það er hægt að skera niðuir í gæðum íbúða. Þannig við þurfum að fara að byggja ódýrara tl þess að mæta eftirspurn þeirra sem geta ekki búið dýrt," segir Davíð.

Davíð segir sveitarfélögin einnig geta lækkað lóðaverð hlutdeild þess af heildarbyggingarkostnaði hefur vaxið mjög hratt á síðustu árum.

„Það gæti hjálpað verulega ef lóðaverðið lækkar," segir Davíð.