Eiga hlut sem er 170 milljóna króna virði

Stjórnendur Haga fengu ekki hlut frá Arion banka í Högum upp á ríflega 300 milljónir, eins og greint var frá í fréttum Stöðvar 2 í kvöld, heldur nemur hluturinn samtals um 170 milljónum. Til viðbótar við þennan 170 milljóna hlut fengu stjórnendurnir hins vegar peningagreiðslu upp á 170 milljónir til viðbótar, og þurfa þeir að standa skil á skatti af heildarvirði þessa samkomulags, virði ríflega 340 milljóna, samkvæmt upplýsingum frá Haraldi Guðna Eiðssyni, hjá samskiptasviði Arion banka.

Í árshlutareikningi Haga fyrir tímabilið frá 1. mars til 31. ágúst á þessu ári kemur fram að Eignabjarg ehf. dótturfélag Arion banka, muni endugreiða stjórnendunum skattgreiðslur vegna samkomulagsins ("In addition Eignabjarg ehf. will reimburse KMP [key management personal] all tax payments levied on them due to this agreement").

Haraldur Guðni segir að útfærslan á samkomulaginu hafi verið með fyrrnefndum hætti, þ.e. annars vegar eignarhlutur í fyrirtækinu og hins vegar peningagreiðsla. Skattur sé hins vegar greiddur af samkomulaginu í heild, en stjórnendur sitji þá eftir með fyrrnefndan 170 milljóna hlut í félaginu.

Samkvæmt stjórnháttaryfirlýsingu Haga, sem birt hefur verið á vefsíðu Haga, eru stjórnendurnir sem gerðu fyrrnefnt samkomulag við Arion banka, Finnur Árnason, forstjóri Haga, Guðmundur Marteinsson, framkvæmdastjóri Bónus, Gunnar Ingi Sigurðsson, framkvæmdastjóri Hagkaupa, Kjartan Már Friðsteinsson, framkvæmdastjóri Banana, og Lárus Óskarsson, framkvæmdastjóri Aðfanga. Finnur á ríflega fjórar milljónir hluta, Guðmundur 2,8 milljónir hluta, Gunnar Ingi 547 þúsund hluti, Kjartan Már ríflega eina milljón hluti, og Lárus 547 þúsund hluti.