Hilmar einn efnilegasti leikarinn í Evrópu

Hilmar Guðjónsson er einn 10 evrópskra leikara sem var valinn í Shooting Star, sem er sérstök kynning á ungum og efnilegum kvikmyndaleikurum sem þykja líklegir til að ná langt í sínu fagi. Hópurinn var kosinn af alþjóðlegri dómnefnd og teljast þeir sem valdir eru Shooting star vera á meðal efnilegustu kvikmyndaleikara Evrópu. Það er European Film Promotion sem stendur fyrir Shooting Star og er Kvikmyndamiðstöð Íslands aðili að þeim samtökum.

Shooting Star hópurinn hverju sinni  er kynntur fyrir alþjóðlegum fagaðilum  á kvikmyndhátíðinni í Berlín, sem næst er haldin 9. -19. febrúar 2012. Á kvikmyndhátíðinni er hópnum gert hátt undir höfði og kastljósinu beint að honum - enda vonast til að viðburðurinn sé stökkpallur til alþjóðlegs frama fyrir þátttakendur.

Hilmar Guðjónsson var fyrst og fremst valinn fyrir frammistöðu sína í kvikmyndinni Á annan veg eftir Hafstein Gunnar Sigurðsson, en einnig var litið til frammistöðu Hilmars í Bjarnfreðarson eftir Ragnar Bragason og hinni væntanlegu kvikmynd, Svartur á leik, eftir Óskar Þór Axelsson.

Í áliti dómnefndar var Hilmar sagður vera „sannfærandi og frábær leikari, með kraftmikinn og einkennandi stíl, sem með fjölbreytileika sínum á vænlegan feril framundan. („A compelling and wonderful actor with a strong, tangible style even playing the seemingly weak, foolish boy at the heart of Either Way. With his versatility and ability to stand out, Gudjónsson has a promising career ahead.”)

Hilmar Guðjónsson leikur annað aðalhlutverkið í kvikmyndinni Á annan veg, sem hefur fengið afar góðar viðtökur erlendis og meðal annars unnið til tvennra alþjóðlegra verðlauna. Vegna fjölda áskorana verður myndin tekin aftur til sýningar í Bíó Paradís þann 9. desember.

Hér er heimasíða Shooting Star.