Annar tveggja Black Pistons-manna tók á sig meginsök

Annar tveggja manna sem ákærðir eru fyrir að svipta rúmlega tvítugan mann frelsi sínu í maí 2011, misþyrma honum hrottalega og reyna að kúga út úr honum fé tók á sig meginsök við aðalmeðferð málsins í Héraðsdómi Reykjavíkur í gær.

Mennirnir eru báðir sagðir félagar í mótorhjólagenginu Black Pistons. Annar þeirra, Davíð Freyr Rúnarsson, játaði að hafa ráðist á fórnarlambið. Hann neitaði að hafa svipt manninn frelsi og sagði hinn manninn, Ríkharð Júlíus Ríkharðsson, sem talinn er forsprakki Black Pistons, lítið sem ekkert hafa tekið þátt í misþyrmingunum.

Davíð Freyr kvaðst hafa sótt fórnarlambið í iðnaðarhverfi í Hafnarfirði og farið með hann heim til Ríkharðs.

„Hann var að bulla hitt og þetta um allan bæ um mig, meðal annars að hann væri að rukka og selja eiturlyf með mér,“ sagði Davíð um fórnarlambið. Hann kvað engum hótunum né bareflum hafa verið beitt. Þegar saksóknari spurði Davíð Frey hvort hann væri að vernda Ríkharð eða láta undan hótunum hans með því að breyta framburði sínum og taka á sig sök kvað Davíð Freyr svo alls ekki vera.

Hann rakti síðan ferðir sínar með fórnarlambinu eftir dvölina heima hjá Ríkharði. Hann kvaðst meðal annars hafa komið við á Bústaðaveginum til að kaupa sér amfetamín. Aftur hefði verið haldið heim til Ríkharðs og þaðan í iðnaðarhúsnæði í Dugguvogi, þar sem dvalið hefði verið um hríð en síðan aftur heim til Ríkharðs.

Ríkharð gerði lítið úr sínum þætti málsins, en kvað fórnarlambið þó „rosalega lygasjúkt kvikindi“ sem skuldaði sér persónulega tvær milljónir fyrir að koma honum út úr vandræðum.

Fyrir dómi lýsti fórnarlambið hvernig sér hefði verið haldið nauðugum, hann barinn með rafmagnssnúrum og moppuskafti, honum hótað að úr honum yrðu dregnar tennur, skorið á sinar hans og neglur fjarlægðar afhenti hann ekki ferðatölvu, tvö sjónvarpstæki, fasteign, mótorhjól og bíla, auk tíu milljóna.

„Þeir sögðu að ég hefði svikið þá og lömdu mig í bak og fyrir,“ sagði fórnarlambið og bætti við að þeir hefðu svo látið stelpu farða sig, en í gögnum málsins eru myndir af unga manninum sem sýna mikla áverka í andliti.

Eftir þetta lá leiðin í Borgartún, þar sem Davíð Freyr lét klippa sig. Fórnarlambið bað þá um að fá að fara á salernið, en hljóp þaðan beint á lögreglustöðina á Hverfisgötu.

jss@frettabladid.is