Birna: Landsbankaleiðin úr samræmi við samkomulag

Bankastjóri Íslandsbanka segir að hægt sé að líta svo á að Landsbankinn hafi tekið sig út úr samstarfi um samræmdar skuldaaðgerðir með Landsbankaleiðinni sem kynnt var í síðustu viku.

Landsbankinn kynnti í síðustu viku ýmsar leiðir til að lækka skuldir viðskiptavina sinna, þar á meðal endurgreiðslu 20% vaxta og breytingu á 110% leiðinni svo hún miðist við fasteignamat en ekki verðmat.

Birna Einarsdóttir, bankastjóri Íslandsbanka, segir að ríkið hafi þegar leitt saman lífeyrissjóði, Íbúðalánasjóð og banka um samræmdar aðgerðir fyrir nokkru síðan, þar á meðal 110% leiðina og vaxtabætur, og það hafi hugnast henni vel.

„Mér finnst þetta samræmi mikilvægast í þessu," segir Birna. „Auðvitað vildu bankarnir hafa rammann utan um 110 prósent leiðina rýmri, en við enduðum með þessum hætti svo lífeyrissjóðirnir og Íbúðalánasjóður gætu verið með í þessu samstarfi."

Er Landsbankinn að storka þeirri lendingu með einhverjum hætti?

„Að sjálfsögðu má líta svo á að ríkisbankinn sé að taka sig út úr þessu samstarfi, sem þarna var sett saman. Þeir hafa gefið upp að þetta kosti um 25 til 30 milljarða, og þá er auðvitað spurning hvort þeim fjármunum hefði verið betur varið til að greiða út arð til ríkisins, sem síðan gæti dreift þessum peningum út með sanngjarnari hætti í gegnum vaxtabótakerfið."

Þá segir hún áhugavert að sjá hvort ríkisstjórnin sé tilbúin að leggja út í tugmilljarða kostnað, sem fylgi sambærilegum aðgerðum fyrir Íbúðalánasjóð og Landsbankinn lagði út í.

Eiginfjárstaða Íslandsbanka er hins vegar sterkust allra bankanna, um 27 prósent, en niðurfærsla lána færist iðulega til lækkunar á eigin fé. En er hægt að nýta það svigrúm til að fara út í svipaðar aðgerðir og Landsbankinn?

„Við höfum verið að nýta þessa sterku stöðu til að koma til móts við okkar viðskiptavini, og við höldum því áfram," segir Birna. „Við erum bara að skoða rammann í kringum 110 prósent leiðina. Við höfðum hugmyndir um að hafa hann rýmri í upphafi, og við erum komin aftur því sama teikniborði og erum að skoða málið."