Ísland tapaði fyrir Króatíu og endaði í sjötta sæti

Ísland tapaði sínum fjórða leik í röð á heimsmeistarakeppninni í Svíþjóð er strákarnir okkar lutu í lægra haldi fyrir Króatíu, 34-33, í leik um fimmta sæti keppninnar.

Frábær leikkafli undir lok fyrri hálfleiks sá til þess að Ísland var með tveggja marka forystu í hálfleik, 16-14.

En leikur liðsins hrundi algerlega um miðbik síðari hálfleiks. Strákarnir náðu með mikilli baráttu að hleypa spennu í leikinn á lokamínútunni en á endanum dugði það ekki til.

Strákarnir byrjuðu á ljómandi fínum nótum í leiknum og komust í 2-1 með tveimur mörkum úr horninu - eitthvað sem hefur vantað í leik Íslands á mótinu.

Björgvin var líka að verja ágætlega í markinu og gerði það fyrstu átta mínúturnar eða svo. En þá fóru Króatar að taka völdin í leiknum og Ivan Pesic fór í gang í marki Króatanna.

Skytturnar Denis Buntic og Drago Vukovic voru liðinu erfiðir auk þess sem að Domagjo Duvnjak, stórskytta úr liði Hamborgar í Þýskalandi, var að hitna.

Eftir stundarfjórðung tók Guðmundur Guðmundsson leikhlé og hreinlega skammaði strákana - það virtist einfaldlega vanta allan baráttuvilja og þrek í þá.

Það virkaði. Síðari stundarfjórðungurinn í þessum hálfleik var líklega einn sá allra besti í þessu móti - ásamt seinni hálfleiknum gegn Noregi. Strákarnir léku við hvern sinn fingur og skoruðu tíu af síðustu fjórtán mörkum hálfleiksins - þar af átta af síðustu níu, og komust tveimur mörkum yfir áður en flautað var til hálfleiks.

Á þessum kafla var Ólafur Stefánsson mjög öflugur og Snorri Steinn Guðjónsson sýndi einnig fína takta. Og það er bara einu sinni þannig - þegar þessir tveir eru í lagi þá er bara heilmikið í lagi hjá íslenska liðinu.

Króatar náðu að koma sér aftur inn í leikinn á fyrsta stundarfjórðungi síðari hálfleiksins. Hreiðar Levý Guðmundsson var kominn í íslenska markið og sýndi glimrandi takta. Strákarnir voru alls ekki að spila illa og náðu að halda í fullu tré við Króatana sem voru að gefa allt sitt í leikinn á þessum tímapunkti.

En þá hrundi leikur íslenska liðsins. Algjörlega og á öllum sviðum. Markvarsla, vörn og sóknarleikur. Það gekk einfaldlega ekkert upp. Króatía breytti stöðunni úr 25-25 í 33-27 og um átta mínútur eftir.

Domagoj Duvnjak var sjóðandi heitur og raðaði inn mörkunum, ásamt þeim Buntic og Vukovic. Þessar skyttur skoruðu nánast af vild. Vörnin gekk ekki út í þær og markvörðurinn kom engum vörnum við - hvorki Hreiðar né Björgvin.

Markvörðurinn Pesic átti einnig stórleik og að lokum var það í raun hann sem kláraði leikinn fyrir Króata. Sá til þess að munurinn væri einfaldlega svo mikill að strákarnir myndu ekki ná þeim.

Það var tæpt því á þessum síðustu mínútum leiksins náðu strákarnir að minnka muninn í eitt mark með hetjulegri baráttu. Strákarnir fengu boltann þegar sjö sekúndur voru eftir en það var ekki nóg. Sóknin rann út í sandinn og niðurstaðan - einkar svekkjandi eins marks tap.

Margir áttu mjög góðan leik í dag þegar best lét. Guðjón Valur sérstaklega en hann fékk loksins almennilega þjónustu í vinstra hornið og blómstraði hann eftir því. Alexander stóð fyrir sínu eins og alltaf og þeir Óli og Snorri náðu mjög vel saman í íslenska sóknarleiknum. Róbert barðist vel á línunni þegar hann fékk boltann.

Varnarleikurinn var mjög misjafn og slæmur þegar að illa gekk. Vignir Svavarsson átti fína spretti en gerði sín mistök, eins og aðrir í vörninni. Björgvin og Hreiðar sýndu báðir lipra takta en duttu líka niður á of löngum köflum.

Ísland varð á sjötta sæti á HM og dylst engum að það er frábær árangur. Sæti í undankeppni Ólympíuleikanna tryggt og margar stórþjóðir í sætunum fyrir neðan okkur.

En það er afar erfitt að þurfa að kyngja því að tapa síðustu fjórum leikjunum á mótinu. Strákarnir spiluðu frábærlega í riðlakeppninni en eitthvað gerðist eftir það.

Strákarnir sýndu í kvöld að þegar þeir ná sér á strik á nánast ekkert lið séns í þá. Króatar eru með margverðlaunað landslið en þeir litu út eins og áhugamenn þegar að Ísland fór á kostum undir lok fyrri hálfleiksins. Strákarnir sýndu hvað þeir geta - en liðið skorti stöðugleikann og því fór sem fór.

Leiknum var lýst beint á Boltavaktinni: Ísland - Króatía.

Ísland - Króatía 33-34 (16-14)

Mörk Íslands (Skot): Guðjón Valur Sigurðsson 10 (16), Snorri Steinn Guðjónsson 7/3 (9/3), Alexander Petersson 6 (12), Ólafur Stefánsson 5/3 (9/3), Arnór Atlason 2 (4), Vignir Svavarsson 1 (1), Ásgeir Örn Hallgrímsson 1 (1), Róbert Gunnarsson 1 (1), Aron Pálmarsson 0 (5).

Varin skot: Björgvin Páll Gústavsson 7 (26/1, 27%), Hreiðar Levy Guðmundsson 7 (22/1, 32%).

Hraðaupphlaupsmörk: 14 (Guðjón Valur 6, Alexander 3, Ólafur 2, Vignir, Ásgeir Örn, Arnór)

Fiskuð víti: 6 (Vignir, Aron, Snorri Steinn, Ólafur, Alexander, Róbert)

Brottvísanir: 8 mínútur



Mörk Króatía (Skot): Denis Buntic 9 (14), Vedran Zrnic 7/2 (8/2), Drago Vukovic 7 (13), Domagoj Duvnjak 6 (7), Igor Vori 2 (4), Marino Maric 1 (1), Marko Kopljar 1 (1), Manuel Strlek 1 (1).

Varin skot: Ivan Pesic 18 (49/4, 37%), Mirko Alilovic 0 (2/2).

Hraðaupphlaupsmörk: 11 (Duvnjak 3, Zrnic 3, Maric, Kopljar, Vori, Vukovic, Buntic)

Fiskuð víti: 2 (Ivano Balic, Vedran Zrnic)

Brottvísanir: 10 mínútur