Landsvirkjun réð 60 manns án auglýsinga á 10 árum

Frá árinu 2000 til síðustu áramóta hefur Landsvirkjun ráðið 60 starfsmenn til starfa án þess að stöður þeirra hafi verið auglýstar. Alls hefur verið ráðið í 170 störf hjá Landsvirkjun á þessu tímabili. Af þeim voru 98 auglýst bæði utan og innan húss en 12 stöður voru eingöngu auglýstar innanhúss.

Þetta kemur fram í svari fjármálaráðherra við fyrirspurn Margrétar Tryggvadóttur þingmanns hreyfingarinnar á Alþingi um starfsmannahald Landsvirkjunar.

Margrét spurði m.a. hversu mörg störf hafa verið auglýst hjá Landsvirkjun frá árinu 2000 og hverjir voru ráðnir í þau störf?

„Á framangreindu tímabili var ráðið í 170 störf, þar af voru 98 störf auglýst bæði utan húss og innan og 12 innan húss. Þá er á meðfylgjandi yfirliti ekki getið um ráðningar í tímabundin störf og sumarstörf námsfólks enda eru sumarstörfin einnig tímabundin. Sumarstörfin eru þó almennt auglýst á vef fyrirtækisins," segir í svarinu.

Þá vildi Margrét vita hvort einhverjir hefðu verið ráðnir án auglýsingar á framangreindu tímabili og þá hverjir?

„Á tímabilinu hafa 60 einstaklingar verið ráðnir án auglýsingar, svo sem fram kemur í meðfylgjandi yfirliti. Sú aðferð brýtur ekki í bága við starfsreglur stjórnarinnar, sbr. áður tilvitnaða grein 11.9. Rétt er að taka fram að frá miðju ári 2008 var verklagi við ráðningar breytt á þann hátt að allar lausar stöður eru auglýstar a.m.k. innan húss," segir í svarinu.

Í tilvitnaða grein 11.9, segir um ráðningar í störf hjá fyrirtækinu: „Forstjóri ræður starfsmenn til fyrirtækisins, segir þeim upp og semur við þá um launakjör. Forstjóri skal þó hafa samráð við stjórnarformann um ráðningu og uppsögn framkvæmdastjóra einstakra sviða Landsvirkjunar."