Atkvæðagreiðsla um Icesave - bein útsending á Vísi

Tæplega þrjátíu þúsund manns hafa skrifað undir áskorun til forsetans um að synja nýjum Icesave-lögum staðfestingar. Búist er við að Alþingi afgreiði í dag sem lög frumvarp vegna nýrra Icesave-samninga.

Bein útsending verður frá atkvæðagreiðslunni hér á Vísi. Hægt verður að sjá hana með því að smella hér.

Þriðja umræða um frumvarp ríkisstjórnarinnar vegna nýrra Icesave-samninga hófst í gær á Alþingi. Þingfundur hefst að nýju klukkan fjögur í dag en búist er við að Alþingi afgreiði frumvarpið sem lög í dag með nokkrum meirihluta en auk flestra stjórnarþingmanna styður meirihluti þingflokks Sjálfstæðisflokksins samningana, en stjórnarandstaðan átti sinn fulltrúa í nýju samninganefndinni og þá lögðu fulltrúar stjórnarandstöðunnar áherslu á að Lee Bucheitt veitti nefndinni forystu sem varð á endanum niðurstaðan.

Ljóst er að enn er mikil andstaða við málið meðal almennings þrátt fyrir fullyrðingar þess efnis að hinir nýju samningar séu umtalsvert betri en þeir eldri. Laust fyrir hádegi höfðu tæplega þrjátíu þúsund manns skráð sig á undirskriftalista á vefsíðunni kjósum.is til að hvetja forseta Íslands til að synja frumvarpi vegna samninganna staðfestingar verði það að lögum. Þetta er svipaður fjöldi og skráði sig á lista gegn fjölmiðlalögunum sumarið 2004, en þá synjaði forsetinn lögunum staðfestingar eftir að um þrjátíu þúsund manns höfðu skrifað undir áskorun þess efnis.

Rúmlega fimmtíu þúsund manns skráðu sig á síðasta ári á undirskriftalista InDefence hópsins gegn síðustu Icesave-samningum en forsetinn varð þá við áskoruninni og beitti synjunarvaldi samkvæmt 26. grein stjórnarskrárinnar í annað skipti í sinni embættistíð.