Búist við að atvinnuleysi aukist

Greining Íslandsbanka býst við því að atvinnuleysi muni aukast á næstunni. Atvinnuleysi mældist 7,7% í nóvember síðastliðnum og jókst um 0,2 prósentustig frá fyrri mánuði, samkvæmt tölum Vinnumálastofnunar. Nýjar tölur verða svo birtar á föstudaginn.

Að meðaltali voru 12.363 manns án atvinnu í nóvember og fjölgaði þeim um 301 manns milli mánaða. Búast má við vaxandi atvinnuleysi á næstunni en á sama tíma og þeim fer fjölgandi sem eru án atvinnu fækkar þeim störfum sem í boði eru og hefur framboðið í raun sjaldan verið minna en nú. Á milli nóvember og desember fyrir ríflega ári síðan fór atvinnuleysi úr 8,0% í 8,2% og er ekki við öðru að búast en svipuð þróun verði nú.

Vinnumálastofnun reiknar með að tölur muni sýna að atvinnuleysi hafi verið á bilinu 7,8% til 8,1% í desember.