Vill að Íslendingar noti kanadískan dollar

Heiðar Már Guðjónsson fjárfestir færir rök fyrir því í Fréttablaðinu í dag að Ísland geti tekið upp kandadadollar. Hann bendir á að margt sé líkt með Íslandi og Kanada. Báðar þjóðirnar séu ungar og eigi framtíðina fyrir sér. Þá bendir hann á að Kanada skuldi lítið, hafi traust fjármálakerfi og frábæran seðlabanka.

„Kanada og Ísland framleiða hrávörur, sem hafa alþjóðlegt verðgildi, en ekki bara í einni mynt. Íslendingar hafa sára reynslu af notkun myntar sem stöðugt rýrnar í verðgildi. Sú mynt sem flestir telja að haldi verðgildi sínu næstu áratugi er Kanadadollar. Og það sem meira er, Kanadamenn vilja gjarnan að við notum þeirra mynt," segir Heiðar Már.

Heiðar Már segir þá staðreynd að helstu viðskiptalönd Íslendinga séu í Evrópu séu í raun ekki rök fyrir því að taka upp evru. Sannleikurinn sé að hrávörur heimsins séu opinberlega verðlagðar í dollar.